發新話題
打印

[經驗分享→] 我家小鬆獅脫水及康復過程~~~

我家小鬆獅脫水及康復過程~~~



我剛剛養鬆獅2,3個月,呢張係買返來果時影的前面果隻係仔,後面係女女.2隻都係3個多月大,果缸溫度係31-33度,有UVA燈每日晒9個半鍾,每星期有比佢地浸鈣粉,個女好精神每日食10隻中蟀,4個月大依家重量都有23g



爬係上面果隻係仔仔已經開始病果時,3個星期前發現隻公開始一隻眼開一隻眼閉,去佐花園街問人,後來買佐支眼藥水比佢滴,滴佐一個星期好似好佐小小,隻公果時每日食3隻中蟀,其他野佢都唔肯食,我都有3-4日浸一次水每次浸20MINS之後每日都有食3-4隻,情況係上星期5惡化,每日只食1-2隻,每日食完就立即返上去晒太陽,之後就唔會再落地行,唔係點開眼,隻手開始抽筋,摸佢都無咩反應,有痾D o者喱既野出來,勁擔心...

第2日我地同佢去佐荃灣果度睇醫生,醫生話佢脫水,同埋個肚可能有虫,要我地同隻女女分開養,開佐3枝藥(包括抗生素),一樽浸身既粉,一樽加落D野食度既粉,一樽眼藥水,總數$700,8日藥,3日後29/9返去覆診,浸水果D營養粉1日浸3-4次,每次浸20-30分鐘,餵食粉就每次都要落,醫生問我地有無晒UVB,UVA燈,我話應該有因為買果時果個人話有的,我話比醫生聽佢唔食野點算,佢話張開佢個口都一定要佢食..每日最小食5隻中蟀,剪開一半慢慢餵,佢叫我地一定要注意力度,如果唔係好易整死佢..我地第一次養真係唔知點做,2個人先可以餵到佢食野,真係好辛苦......醫生問我地有無晒UVB,UVA燈,我話應該有因為買果時果個人話有的,我地都係唔太肯定,第2日出佐去問,原來無既.....最後買佐盏OWER SUN..好貴....

鬆獅仔仔奮鬥過程:
(睇醫生果日)第一日 26/9:浸佐2次水(因為有事做所以浸唔到3次...),食佐藥,餵佢食果時下爬已經變晒黑色..我知道佢一定好辛苦,放落口有時會吐返出來,最後用佐差唔多成個鍾2個人先餵到5隻中蟀,放返去晒燈,定時餵藥,D藥好難餵因為只係要食0.01ML,好難抽出來,無張開眼,全日都無郁過...都係無咩改善...
第2日 27/9:浸佐3次水浸水果時手腳無力差D浸親,我一直用手扶住佢浸佐半個鍾,食佐藥,強行餵佐4隻,餵佢食中蟀果時放到入口佢突然無晒反應..我地不停搖佢後來醒返,真係嚇死我地...唔想佢再辛苦比佢入去休息,都係成日無郁過隻眼無打開過,個身變佐灰色,又有肚痾,情況變差佐咁...我地好擔心...
第3日 28/9:每2個鍾浸一次水,我地捉佢果時已經無咩反抗...餵佐4隻中蟀,都係唔肯飲水同埋都有肚痾,成日都唔行過,醫生打來問情況,我講完比佢聽之後,佢叫我今晚同佢返去覆診,返佐去之後醫生話情況變差,清醒能力減小叫我地要有心理準備...跟住我即刻喊佐出來....開始打抗生素同埋皮下水,抗生素要打5日,每3日返去打一次針,同埋要多D同佢浸水,2枝針同埋醫生費一共$315,好怕佢會死.....
第4日 29/9:每2個鍾浸一次水,每次30分鐘,強行餵佐4隻中蟀,夜晚佢肯自己食1隻中蟀,多佐望住我地,自己行來行去,我叫佢,佢都會望我.
第5日 30/9:每2個鍾浸一次水,每次30分鐘,今日佢終於肯自己食4隻中蟀,我地係每一次浸完水半個鍾比一次佢食的,終於唔駛餵佢啦~~餵佢真係好難好難..同埋佢自己肯行來行去,多佐好多時間望我地,今日浸完水佢精神好多,我地覺得佢只係脫水唔係有虫,所以放返同女女一齊住,佢第一時間爬上女女度,又養佐個曬點比仔仔,見佢2個走來走去,一齊拍玻璃,仔仔好精神,好似以前咁囉~開心到喊佐出來~好感動,
第6日 1/10:每2個鍾浸一次水,每次30分鐘,今日同佢返去打針,想問醫生可唔可以唔打因為佢好精神,跟住佢話唔可以,因為佢話醫爬蟲既藥好小,抗生素一定要打5次,如果唔打晒一個療程下次會對呢種藥有抗藥性,再有病下次就無藥幫到佢,所以唯有繼續打落去,收費$95,仲有2針就打完囉,希望快D打完啦~~
第7日 2/10:今日浸佐3次水,每次30分鐘,今日12:00食佐3隻中蟀,夜晚8:00食佐3隻,好精神走來走去,係我地身上爬來爬去,雖然未叫做好返晒,但係肯自己食野,有返精神我地已經好開心囉~



我同我老公第一次養,有好多野都唔識,我上佐好多爬蟲類網站睇佐好耐,學到好多野,雖然我只係用佐$1200買2隻鬆獅返來,其實今次病我知道睇獸醫好貴,但係我真係唔想放棄佢,好想盡力救番佢,買佢果時到預佐佢會病,病一定會同佢睇獸醫,睇佐都救唔番我地到無辦法,今次學到好多爬蟲類既知識
獸醫意見有:
1. 如果佢地唔食野,強行餵都一定要食正常食量,最好比佢食蟋蟀不論大小都要一開2餵 佢,佢會容易D消化,
2. 如果有脫水情況一定要多D同佢浸水,最好浸呢隻,因為佢其實係食物來的,佢就算食得小都會有吸收到營養,一日3-4次浸完要曬2個鍾比佢吸收UVA,UAB



3. 浸水果時用手去整濕佢個口,佢自然會伸脷的,就會飲到D水的
         
只係我希望可以同各位分享一下,希望大家唔好介意,希望大家既爬爬都身體健康,快高長大啦~^^

TOP

謝謝分享
希望牠繼續康復

TOP

今日去打最後一針~醫生話仔仔已經完全好返囉~^^
剛剛去見醫生果時只得10G...依家已經有16G囉~哈哈
希望佢地健健康康啦~^^

TOP

發新話題